عندك.. دم؟!

ماشي أنت في الشارع ومش واخد أي خوانة.. تلمح عربية تابعة لوزارة الصحة راكنة على جنب.. عادي خالص..

تكمل طريقك وأنت تدندن أغنية "تامر حسني"..
- "أرجع لك يعني حرقة دم"

تقترب منك الممرضة وهي تقول لك:
- "أستاذ أستاذ.. ممكن تتبرع معانا بالدم!"
-"أسمع لك كل كلامك هم! "

ثم وأنت تهرول من جوار الممرضة
"معلش يا حاجة أصل أنا لسه متبرع من أسبوع!"


جالس أنت مع شلتك في قلب الجامعة..
تلمح الطبيب بزيه الأبيض المميز وهو يقترب من جلستكم.. تقول بصوت عال حتى يسمعه كل أصحابك:
"كبسة يا رجالة!"

يجري الجميع يمينا ويسارا وعندما تهم أنت بالوقوف تجد الطبيب -حديث التخرج غالبا- صاحب الملامح الطيبة يمسك بالسماعة في يده وهو يقول لك في لطف:
"برافو عليك والله.. كنت عارف إنك أنت الوحيد اللي هتوافق تتبرع بالدم"

وأنت تستعد للخلعان وقد أخذت وضع العداء الجامايكي "أسافا باول" بطل العالم في سباق الـ100 متر:
"معلش والله يا دكتور.. عندي محاضرة مهمة ولازم ألحقها.. يرضيك أسقط يعني.. يرضيك!"


وأنت تسير مع خطيبتك- مشيها خطيبتك!- لمحت سيارة التبرع بالدم منتظرة على أول الشارع.. تنظر إلى خطيبتك- قلنا هنمشيها كده!- في هيام ثم تقول لها:
إيه رأيك يا حبيبتي.. طالما احنا مش هنتجوز إلا بعد مية سنة.. ما تيجي نعمل عمل خير مشترك نفتكر به حبنا.

ترتعش يد خطيبتك ثم تقول:
لأ.. أخاف يا عم!

وأنت تجذب يدها متجها نحو السيارة:
ماتخافيش ماتخافيش.. ده الإبرة مش هتحسي بيها بجد.. وبعدين الناس اللي معاها فلوس بتزكي بفلوسها.. لكن اللي مش معاهم زينا كويس إن عندهم دم يزكوا بيه عن نفسهم.. يالاّ يا شيخة.. دول حتى هيشربونا عصير!


بعد أن انتهيت من أداء صلاة العصر في المسجد.. وجدت الإمام يمسك الميكروفون بيده ثم يقول: "والله يا جماعة فيه مريض محتاج نقل دم ضروري من أجل إجراء عملية جراحية خطيرة.. الفصيلة "O" والأجر والثواب عند الله"

تتذكر أنك متفق مع أصحابك على أن تقابلهم بعد صلاة العصر مباشرة "عشان تلعب ماتش كورة ماحصلش".. تردد في نفسك "هو أنا صحيح O.. بس يعني كده هأضيع ييجي ساعة.. وبعدين مستشفيات ووجع دماغ.. وأكيد مش هألحق ماتش الكورة"..

تلمح معظم المصلين وقد خرجوا من المسجد.. والإمام ينظر للجميع في أسى.. تمسك أنت بحذائك وتضع قدمك اليمنى خارج الجامع..

ثم..
"قلت لي المستشفى فين يا سيدنا الشيخ؟"





اعترف..
حصل معاك موقف من المواقف دي ولا لأ؟
وكنت مين في الناس اللي فوق دول؟


كنت من النوع اللي.. بينسى إن "عنده دم" ممكن يتبرع ويساعد بيه... ومتخيل إن اللي بيجري في عروقه ده مش أكتر من شوية ميه معدنية صغيرين أو زجاجة بيبسي كولا ماحدش ينفع يشاركه فيها؟

ولا من النوع اللي.. "عنده دم" واللي أول مايشوف عربية التبرع بالدم يجري عليها وياخدها في حضنه ويكشف عن ذراعه اليمين والشمال ورجليه اليمين والشمال وهو يتوسل للأطباء: والنبي خدوا دمي.. يا جدعان عاوز أتبرع.. هأموت خلاص مش قادر..!

خلينا نكون صرحاء مع بعض..
وإذا كان فيه نسبة كبيرة منكم بتتبرع بالدم.. فدول ناس حلوين وجدعان ومتشكرين يا شباب
لكن خلينا برضه نعترف بأن فيه نسبة كبيرة مننا بتخاف تتبرع بالدم..
وخاصة بعد قضية فساد أكياس وقرب الدم اللي تفجرت مؤخرا في مصر..


بس السؤال هنا هو..
الكلام ده بيحصل من قبل قضية الدم الفاسد دي .. ولا من بعدها؟!
معلش خلينا نجاوب احنا المرة دي ونقول
لأ.. بيحصل من قبلها، والتبرع بالدم في مصر ماكانش محقق نسب عالية قبل القضية وطبعا النسبة قلت بعدها..

ولو عندك أسباب أكتر.. اكتب يا عم ولا يهمك...

بس الأهم.. إنك تكتب لنا قائمة بالحاجات اللي لو حصلت هتتبرع بالدم وأنت في منتهى الرضا والرغبة والامتنان والفرح وحتى لو ماكانش فيها عصير أو بسكويت..

حتى من غير ما التليفزيون يوجع دماغك بإعلانات إن الدم اللي بتتبرع بيه ممكن يروح لوالدك أو والدتك أو أخوك لو تعرضوا لمكروه..
وحتى من غير ما تعرف إن التبرع بالدم مفيد جدا لأنه بينشط خلايا نخاع العظام لديك وهي أصلا المسئولة عن تصنيع الدم..

وخليك فاكر.. إن التبرع بالدم مش إجباري زي الخدمة العسكرية.. وهو في الأول وفي الآخر عمل تطوعي بتعمله بإرادتك.. لأن الأصل في الحياة كده.. مافيش خير بالإجبار.. الخير دايما بينبع من جواك..

لو عندك دم..
أكيد هتعرف قيمته وأهميته لكل الناس اللي محتاجاه..

أكيد هتعرف إن الحياة مش طريق سريع رايح بس.. لأ.. دي طريق ترابي مليان حفر ومطبات والعربيات فيه رايحة وجاية.. والحوادث ملياه.. وإنه لو عندك دم فعلا.. أكيد هتقف في يوم عشان تساعد اللي محتاج.. عشان ممكن بكره تكون أنت اللي محتاج المساعدة.. ومحتاج الدم..

أكيد مش هتسبنى كده اتكلم كتير لوحدىا وهتكتب وتقول لنا..

اتبرعت بالدم قبل كده.. وليه.. جربتها تاني ولا لأ.. وبرضه ليه..
والأهم إيه اللي بيخليك تخاف من التبرع بالدم؟
وإيه اللي لو اتغير هتتبرع على طول وأنت مبسوط كمان؟

اكتب بسرعة يا عم.. عربية التبرع راكنة ومستنياك!

لا انا بتبرع حتى ولو بيتباع
المهم عندى انت بتبرع ليه وبنية ايه
هم بقى يبعوه يبقى حسابهم مع ربنا....؟
لان فى ناس بتبقى محتاجه اوى للدم حتى ولو هتشتريه